शरद पवारांच्या राष्ट्रवादीचे भाजपाला कमालीचे टेन्शन  !  जिल्ह्यात तुतारी सुसाट

सोलापूर – ( विनायक होटकर  )  राज्यात विधानसभा निवडणुकीचे बिगुल वाजल्यानंतर सर्वत्र उमेदवारीसाठी रस्सीखेच सुरू झाली आहे. सोलापूर शहर आणि जिल्ह्यातील एकूण ११ विधानसभा मतदारसंघांमध्ये महायुती आणि महाविकास आघाडीचा उमेदवारी देताना मोठा कस लागणार आहे. तर दुसरीकडे शरद पवारांच्या राष्ट्रवादीचे भाजपला कमालीचे टेन्शन आल्याचे चित्र दिसून येत आहे. महायुती विरुद्ध महाविकास आघाडी असे चित्र डोळ्यासमोर दिसत असले तरी लोकसभेप्रमाणे मराठा आरक्षणाचासुद्धा मोठा फटका भाजपाला बसण्याची दाट शक्यता आहे.

   नुकत्याच झालेल्या लोकसभा निवडणुकीमध्ये सोलापूर आणि माढा लोकसभा मतदारसंघात भाजपाच्या खासदारांना धोबीपछाड देत काँग्रेस आणि राष्ट्रवादी शरद पवार गटाने आपले दोन उमेदवार दिल्लीत पाठवल्यानंतर आता विधानसभा निवडणुकीत सुद्धा मोठी चुरस निर्माण झाल्याचे दिसून येत आहे. भाजपाकडून विद्यमान आमदारांना पुन्हा एकदा संधी मिळण्याची दाट शक्यता असल्यामुळे त्यांनी आपला नियमित प्रचार सुरू ठेवला आहे. तर महाविकास आघाडीकडून पुन्हा एकदा नव्या जुन्या नेत्यांमधील उमेदवारांचा शोध घेऊन त्यांना विधानसभा निवडणुकीत उतरविण्यात येत आहे.अजितदादा पवार यांच्या राष्ट्रवादी गटालासुद्धा सांगोला आणि मोहोळ मतदारसंघात मोठे भगदाड पडले आहे. राष्ट्रवादी अजितदादा पवार गटाचे जिल्हाध्यक्ष व माजी आमदार दीपक साळुंखे पाटील यांनी उद्धव ठाकरे गटात प्रवेश केला आहे. तर याच गटाचे राज्याचे प्रवक्ते उमेश पाटील यांनी अजितदादा यांना सोडचिठ्ठी देत शरद पवारांसोबत जाण्याचा निर्णय घेतला आहे. शिवसेनेकडून लढलेले माजी मंत्री दिलीप सोपल माजी मंत्री लक्ष्मणराव ढोबळे तसेच माजी आमदार दिलीप माने माजी आमदार प्रशांत परिचारक यांना निवडणुकीच्या रिंगणात उतरण्याच्या हालचाली सुरू आहेत. लोकसभा निवडणुकीच्या माध्यमातून अजित पवार गटाकडे गेलेल्या नेत्यांचा लोंढा पुन्हा शरद पवार गटाकडे येताना दिसून येत आहे.

   पश्चिम महाराष्ट्रातील एक राजकारणातील मोठे घराणे म्हणून ओळख असलेल्या मोहिते – पाटील परिवाराने आता भाजपची साथ सोडून राष्ट्रवादी शरद पवार यांच्या सोबत जाण्याचा निर्णय घेतल्यामुळे त्यांच्या या राजकीय निर्णयाचा सोलापूर जिल्ह्यातील ११ पैकी माळशिरस, माढा, करमाळा, पंढरपूर, सांगोला तसेच मोहोळ या विधानसभा मतदारसंघांवर मोठा परिणाम होण्याची शक्यता वर्तविण्यात येत आहे.एकूणच यंदाच्या निवडणूकीत महाविकास आघाडी मुसंडी मारण्याची शक्यता वर्तवली जात आहे.

 —————————–——-

२०१९ मध्ये महायुतीचा झेंडा !

————————————-

२०१९ मध्ये पार पडलेल्या विधानसभा निवडणुकीमध्ये सोलापूर जिल्ह्यातील ११ पैकी पाच जागांवर महायुतीच्या उमेदवारांनी बाजी मारली होती ( विजयकुमार देशमुख, सुभाष देशमुख, राम सातपुते, सचिन कल्याणशेट्टी, शहाजीबापू पाटील ) .तर चार जागा महाआघाडीने ( प्रणिती शिंदे, यशवंत माने, स्वर्गीय भारत भालके आणि बबनदादा शिंदे   )पटकावल्या होत्या. करमाळा आणि बार्शी या दोन जागा ( संजयमामा शिंदे आणि राजेंद्र राऊत )मिळवून अपक्षांनी राजकीय पक्षाच्या उमेदवारांना त्यांची जागा दाखवून दिली होती. सुभाष देशमुख, विजयकुमार देशमुख ,प्रणिती शिंदे, बबनदादा शिंदे, सचिन कल्याणशेट्टी ,स्वर्गीय भारत भालके ,शहाजी बापू पाटील, राम सातपुते, राजेंद्र राऊत, यशवंत माने आणि संजयमामा शिंदे यांनी विधानसभेत आपापल्या मतदारसंघाचे प्रतिनिधित्व केले आहे. यापैकी पंढरपूर- मंगळवेढा मतदारसंघात स्वर्गीय भारत भालके यांचे निधन झाल्यामुळे झालेल्या पोटनिवडणुकीमध्ये त्यांचे सुपुत्र भगीरथ भालके यांचा पराभव करून भाजपाचे समाधान आवताडे निवडून आले होते.सध्या महायुतीकडे प्रणिती शिंदे वगळता १० आमदार आहेत. यातील काहीजण महाविकास आघाडीकडे आकर्षित झाले आहेत. त्यामुळे सोलापुरात महायुतीवर मोठे संकट आले आहे.